Logo CFPO
  • Occitan
  • Français

Regroupement du 10 avril 2010

Lo dissabte 10 d’abrial participèri al musèu del Roergue dins Avairon al recampament de mièg-percors de la formacion Escapolaire perfeccionament.

Lo dissabte 10 d’abrial participèri al musèu del Roergue dins Avairon al recampament de mièg-percors de la formacion Escapolaire perfeccionament. L’arrivada al matinet a Salas Comtals èra una bela sorpresa. La pissa a la dintrada del vilatge, la rancareda que los ostals s’i apiejavon, lo polit verd de la natura a l’entorn, tot aquò faguèt una bèla impression, sobretot quand òm arriba de la vila, es a dire per ieu de Tolosa.

A dètz oras, aprèp qualques escambis amb los estagiaris de Milhau e de Fijac, qu’aviá pas encara encontrats, lo recampament començèt, plaçat jos lo signe de l’emplec coma lo descubriguèrem dins la grasilha de la jornada.

La matinada, tres professionals occitanafòns venguèron presentar lor mestièr, Olivièr, professor dins l’educacion nacionala, Joan-Pèire, director de l’associacion ADOC12 dins Avairon, e Coleta, que trabalha a la Mission Cultura del Conselh General d’Avairon. En gropetons, lor poguèrem pausar de questions sus lors motivacions, lors percors, las dificultats qu’an agut encontradas dins lor trabalh, los punts positius d’aiceste.

Coma m’interessa lo mitan associatiu, elegiguèri lo grope amb Joan-Pèire, èra fòrça interessant de pausar de questions sus son percors e sus la creacion de l’associacion ADOC12, e de son projècte de sensabilisacion/iniciacion a la lenga d’òc dins mai de 80 escòlas primàrias publicas e privadas del departament. Las dificultats de la debuta per dintrar dins las escòlas se son estompadas e lo problèma màger a l’ora d’ara es lo finançament. Mai que mai sostenguda pel Conselh General, l’accion menada per tocar encara mai d’escolans a besonh ara d’autres finançaments. Lo trabalh de Joan-Pèire es principalement aquel, en mai d’organizar lo trabalh d’un desenat de salariats. Parlèrem tanben del trabalh d’aqueles intervenents, pas totjorn aisit per que precari, per que pas tròp pagat.

Lo problèma de continuitat tanben es un problèma : prepausar una iniciacion en escòla primària quand i a pas cap d’opcion al collègi o de possibilitats de continuar l’apprentissatge es pas tròp coërent, es un fren al desvelopament.

A la fin, cada grop presentèt lo trabalh d’un professional als autres grops e foguèt l’ocasion d’apregondir, d’enlarguesir, de comparar amb d’autras professions, d’autres departaments, d’autras lengas.

Josiane de Fijac nos presentèt tanben lo sit del centre de formacion a la lenga bretona STUMDI qu’existís (lo centre) dempuèi mai de vint ans. Del siti de STUMDI s’inspira lo sit creat i a pauc de temps de l’IEO, « emplec.com » ; las accions de formacion que recampan fòrça aprenents del breton son un tanben exemple interessant pel CFPO. Èra l’ocasion d’agachar un pauc çò que se fa dins d’autres regions de França.

Lo temps del dinnar arribèt e lo solelh generós nos permetèt de manjar defòra las especialitats que cadun aviá portat dins la biaça. Seguiguèt lo bilanç de mièg-percors, un puntet suls estagis, e per acabar, Joan-Pèire nos guidèt per una visita en occitan del musèu del Roèrgue, que nos acculhissiá. Descubrir lo mond dels molins e dels espleches, de las maquinas que nos parlan dels òmes e de las bèstias, de lors vidas entremescladas…Malurasament, èra ja temps de s’en tornar a la vila…

Fin finala, regreti pas d’èsser anada tan luènh per que la jormada foguèt fòrça agradiva e constructiva. Practiquèrem la lenga, mangèrem e beguèrem plan, discutèrem de causas utilas e interessantas… Un sol desplaser, pas aver agut mai de temps per vistalhar lo vilatge e qualques salas del musèu. Mas i tornarai, plan segur ! Marion

by-nc-nd.eu
Creative Commons License
Les informations sur le site du CFPO Miègjorn-Pirenèus sont mises à disposition selon les termes de la licence Creative Commons Paternité-Pas d’Utilisation Commerciale-Pas de Modification 2.0 France. Les autorisations au-delà du champ de cette licence peuvent être obtenues à http://cfpoc.net/accueil/qui-sommes-nous/nous-contacter/

Save

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *