Logo CFPO
  • Occitan
  • Français

Remesa dels diplòmas 2009

Lo Centre de Formacion Professionala Occitan Miègjorn-Pirenèus a remes los diplòmas de lenga e cultura occitanas de nivèl A2 e B2, a l’Ostal d’Occitania de Tolosa.

Lo 16 de setembre, lo Centre de Formacion Professionala Occitan Miègjorn-Pirenèus a remes los diplòmas de lenga e cultura occitanas de nivèl A2 (utilizator elementari) e B2 (utilizator independent), a l’Ostal d’Occitania de Tolosa. Ongan, 72 personas an presentat, amb succès, lo Diplòma d’Escapolaire A2 en Miègjorn-Pirenèus. I comptam 47 escolans de las escòlas Calandreta, 16 estagiaris de la formacion a distància prepausada mercés lo resèu Pyramide, e 9 personas que l’an passat en candidat liure, que 5 ne son collegians. Tanben, doas sessions de l’examen de nivèl B2, a Rodés e a Tolosa, an permés a 9 personas de la region de verificar lor nivèl, que correspond al nivèl de mestresa d’una lenga viva.

Abans la remesa dels diplòmas, un vespertin èra ofèrt als enfants per la Federacion de las Calandretas de Garona-Nauta.

Los Diplòmas Escapolaire A2 et Nivèl B2 meses en plaça per la ret dels CFPO validan de competéncias definidas pel Quadre Europenc Comun de Referéncias per las Lengas (QECRL) en occitan lengadocian e gascon. Son de repèris utils pel mercat del trabalh, qu’es una nòrma europenca. Dempuèi lo mes de junh de 2005, las espròvas d’examen Escapolaire A2 e Nivèl B2 son prepausadas dins tres regions : en Miègjorn-Pirenèus, pel CFPO Miègjorn-Pirenèus de Tolosa ; en Aquitània pel CFPÒC d’Ortés ; en Lengadòc-Rosselhon pel CFPO Lengadòc de Besièrs. Ongan, totes los escolans de CM2 de las escòlas Calandreta d’Occitania an presentat lo diplòma Escapolaire A2. Aquò representa 197 escolans occitanofònes. La mesa en plaça sistematica d’aquel examen a necessitat un investiment fòrt de tota la ret dels CFPO, e tanben d’una equipa de corrector benevòls. Mas a pagat, amb un taus de reussita de 100% en Miègjorn-Pirenèus e 99,5% sus l’Occitania tota.

by-nc-nd.eu
Creative Commons License
Les informations sur le site du CFPO Miègjorn-Pirenèus sont mises à disposition selon les termes de la licence Creative Commons Paternité-Pas d’Utilisation Commerciale-Pas de Modification 2.0 France. Les autorisations au-delà du champ de cette licence peuvent être obtenues à http://cfpoc.net/accueil/qui-sommes-nous/nous-contacter/

Daissar un comentari

Vòstra adreça de messatjariá serà pas publicada. Los camps obligatòris son indicats amb *